Kaixo-kaixo GAZEko lagunok!
Ikasketak alde batera utzi ditugunez, eta uda sasoia izanik, seguruenik GAZEpost berririk ez zenuten espero, ezta? Kontua da, gure aurtengo Proiektuari amaiera eman zion ekitaldiaren nondik norakoak ez dizkizuegula kontatu! Horretara doa, beraz, gure blogeko aurtengo azkeneko sarrera hau.
Gogoratuko duzuenez, ekainaren 13an izan genuen hitzordua GAZEkonekt Proiektuaren Ekitaldi Finalarekin. Gipuzkoako UPV/EHUko Campuseko Carlos Santamaria eraikineko erakusketa aretoan bildu ginen GAZEkideok eta GAZE Programaren lagunak: Goi-mailako hezkuntzako zentroetako irakasle eta ikasleak, erakundeetako arduradunak, Gaztezulo eta GoiEner kooperatiba energetikoko ordezkariak, EKINEZ, BURUJABE! Lehiaketako parte-hartzaileak eta beren esperientziak kontatzera etorritako hainbat gazte ekintzaile.
Argazkian: Joseba Amondarain (GFA) eta Ana Arrieta (UPV/EHU), ekitaldiari hasiera ematen.
Egitarauari jarraiki, Ana Arrietak -UPV/EHUko Gipuzkoako Campuseko errektoreordeak- eta Joseba Amondarainek -Gipuzkoako Foru Aldundiko Jakintza eta Enpresa Jarduera Sustatzeko zerbitzuburuak- hartu zuten hitza ekitaldiari hasiera emateko.
Honen ostean, aurten Proiektuan parte hartu duten GAZEkideen txanda izan zen: Igor M. (Montuschi), Teresa, Mikel, Luis, Goizalde, Ander, Maider eta Igor S. (Sañudo)-ren txanda, beraz. Gure BLOGa eta maiatzean argitaratutako maGAZinE-aren bertsio digitala erabiliz, ikasturtean zehar interesgarriak iruditu zaizkien ekimen, proiektu eta esperientzia ekintzaileak aurkeztu zituzten, eta euren buruak ere bai.
GAZEkideen aurkezpenak eta gero, eragile sozialekin egindako elkarlana laburtzen duten bi bideoren proiekzioari ekin genion.
Argazkian: Mikel Beldarrain GAZEkidea, RaspZeppelin-a gidatzen tablet baten bidez.
Bideoak ikusi ondoren, Gipuzkoako Goi-mailako Heziketa zentroetan identifikatutako ekimen ezberdinen berri ematera etorritako ikasleen txanda izan zen.
UPV/EHUtik, Borja Velez, Jone Arruabarrena eta Elena Bouzo Arkitekturako ikasleak etorri ziren Silva Macua proiektua aurkezteko. TECNUNetik, Iñigo Garcia de Madinabeitia, Ingeniaritzan lizentziatu berria, GreenRoad ekimenaren inguruan aritu zitzaigun. Mondragon Unibertsitatetik, Xabier Ortiz izan genuen, eta Ametsen Ekaitza deituriko egitasmoa aurkeztu zigun, aurretik gure post-etan aipatu izan duguna (beste egitasmo batzuk bezalaxe). Azkenik, TKNIKAtik, gure GAZEkide polifazetikoena izan den Mikel Beldarrainek hartu zuen hitza; RaspZeppelin-a azaldu eta ikusarazi zigun.
Buf! Eta hau guztia lehenengo atalean bakarrik egin genuen. Ordurako atsedentxo bat behar genuen, beraz, primeran etorri zitzaigun FICEko kafetegiko langileek prestatu ziguten coffee-break-a!
Argazkian: GAZEkideak eta parte-hartzaileak elkarlanean.
Izan ere, Hitzaldi-Tailerraren bigarren atalean, work-café-aren metodologia erabili genuen gure workshop-ari ekiteko. Talde-lanean aritu ginen, eta GAZE Programarentzat garrantzitsuak diren lau ardatzen inguruan hausnartu genuen: Emakumeak eta ekintzailetasuna, Gazteak eta parte-hartzea, Gobernantza-ereduak eta Goi-mailako zentroen arteko elkarlana.
Hona hemen atera genituen ondorio eta ideiekin osatu genuen muraletako bat!
Argazkian: ‘Goi-mailako zentroen arteko elkarlana’ gaiari buruzko murala.
Ekitaldiari amaiera borobila emateko, EKINEZ, BURUJABE! Lehiaketan saritutako ideien aurkezpenak eta sari banaketa izan genituen, UEUko zuzendaria den Iñaki Alegriaren parte-hartze bereziarekin. Saritutako ideiak, dakizuen bezala, ArkDoubt (Arkitektura, UPV/EHU), Berreibar (Arkitektura, UPV/EHU) eta RaspZeppelin (TKNIKA) izan ziren. Zorionak, berriz ere, irabazleei!
Amaierara arte gurekin geratu ziren lagunekin, pintxo eta edari sorta elkarbanatu genituen, irribarrea, berba, eta ilusioa galdu barik.
CIDIReko teknikariak arduratu ziren ekitaldia grabatu, editatu eta bideoa (bi zatitan) EHUtb kanalera igotzeaz (eskerrik asko, haiei ere!):
1. zatia: http://ehutb.ehu.es/es/video/index/uuid/53a2ef83c991e.html
2. zatia: http://ehutb.ehu.es/es/video/index/uuid/53a2f5d477ee1.html
2014ko GAZEkideok, «laster arte» esaten dizuegu!
Tania Martínez Portugal